|
Euskararen alde AEK-k antolatzen duen Korrika pixkanaka mundu zabalera hedatzen ari da, eta hainbat hizkuntza gutxituk hartu dute adibidetzat. Aurten egin dute lehen aldiz gaelikoaren aldeko Korrika, Rith 2010, eta Bretainian Ar Redadeg, bretoieraren aldeko lasterketaren bigarren edizioa, gaur hasiko da Roazhon-en ostiralean Pondinen amaitzeko. Maiatzaren 10etik 15era burutuko dute beraz eta 1.200 kilometroko luzera izango du guztira.
AEK-k 1098. kilometroan parte hartuko du , maiatzaren 15ean. Osatzen ari den delegazioan Maider Heguy (Iparraldeko AEK-ko presidentea) eta Jakes Bortayrou (Iparraldeko arduraduna) izanen dira.
Aurtengoan, Diwan bretoierazko eskolen eta egitasmoen alde 100.000 euro biltzea izango du xede Ar Redadeg-ek.
Bretainiarrek, 2008an antolatu zuten euren lehen Ar Redadeg (lasterketa bretoieraz), eta Naoned-etik (Nantes), Karaez-era (Carhaix), 600 kilometroko ibilbidea burutu zuten orduan. Bretoiera garatzeko dirua biltzea eta bretoieraren alde jendea mobilizatzea du helburu lasterketak. Lasterketak ume zein helduentzako bretoierazko eskolak dituzten udalerriak zeharkatzen ditu, eta Korrikan egiten den bezala, lekuko bat pasatzen diote korrikalariek elkarri eskutik eskura eta kilometroz kilometro, hizkuntzaren transmisioa irudikatzeko. Lekukoak, gainera, azken egunean ezagutaraziko den mezu bat darama barnean.
|
